2Cor 12 | MHL | STEP | Naapeya yo unuma me yame pirowa nain unuma yame pirinen. Makena, yo unuma yame piriyem nain oram-ke, nain-ke me yia asipinon. Maa maneka fain naep maiyem, yo yena mokoka-keriw kirep maa urufam nain maemi maa kokot eena yiena Maneka efa ofakowak nain aakisa maekam naep.

2 Corinthians 12

Pol mokoka-keriw kirep maa urufak, ne sirirowa aawok

1 Naapeya yo unuma me yame pirowa nain unuma yame pirinen. Makena, yo unuma yame piriyem nain oram-ke, nain-ke me yia asipinon. Maa maneka fain naep maiyem, yo yena mokoka-keriw kirep maa urufam nain maemi maa kokot eena yiena Maneka efa ofakowak nain aakisa maekam naep. 2 Feenap, Krais teeria mua-ko iiriw Mua Maneka-ke miiwa-pa aawep owow iinan akena pikiwok. Nain mokoma ten kuisow nainiw erepam iiriw ikiwok. Nain yo me amisarem, mia onaiya aawep purupok-i e oram kukusa muutiw wiar aawok, Mua Maneka ona amisarek. 3 Ne yo amisarem nain pun makena. Mua Maneka-ke mua nain miiwa-pa aawep owow iinan eena owow eliwa nain pikiwok, mia onaiya aawep purupok-i e kukusa muutiw aawok, nain Mua Maneka ona amisarek. 4 Mua nain owow eliwa-pa nan ikok opor onaiya akena-ko miimak. Opora nain kemena wiar amisarowa me pepek, ne mua kuisow opor kemena wiar maowa nain pun me pepek. 5 Naeya yo mua nain maemi unuma eliw purupinen. Ne yo yena yame maemi unuma me yame pirinen, weetak. Makena, yo eena kekanowa marewarem nain muutiw maemi maem-miawinen. 6 Ne yo maa naap nain maemi unuma yame pirekam-na nain yo opor makeniw maekam. Ne feenap me efa maikuan, “O momorarek.” Nain yo maa naap nain me maiyem, moram oko mua oko-ke efar miimap efa kakaemi unum maneka yiikuan. Yo nain miatiniyem. Yo uuwiyem nain, ne opora nia maakiyem nain muutiw efa kema suuwap yo mua kamenap nain-ke, nain efa mauk.

7 Nain yo owow iinan-pa ikok maa unowa urufomakem nain oko o wame pirinon naep Mua Maneka-ke naeya sirirowa oko yo mia-pa efar imenarek nain Satan-ke sesekeya sirirowa maneka aawem-ikaiyem. 8 Ne sirirowa nain efar iirarinok naep Mua Maneka faremi nokarowa arow arem. 9 Naap nokarem-na wia, ne efa maakek, “Yo nefa kemalep nefa kekanowam-ikowa nain eliw. No kekanowa marewarin nain yos-ke nefa kekanowamkun kekanowa baliwep efar amisarinan,” naap efa maakek. Naapeya yo kekanowa marewariyem fain kemelap maem-miawiyem. Naeya Krais ona efa kekanowam-ikainon. 10 Ne naapeya yo Krais muuta nain neek efa samo-samoruk, pina ne sirirowa sira-sira yiuk, ne yoowa eliw aawinen, yo eliw kekanowa marew ikainen naiyem. Moram yo kekanowa marewarep Krais kekanowa wiar aawep kekaninen naiyem.

Pol wi Korin kema moke wia ikua

11 Aa yo mores kamenap naep aakunowa momor aakuniyem aa. Nain onoma niena niar ikua. Moram yo eena uuwowa onam nain nis-ke eliwa efar maowa nain, naap me efa maeman. Naapeya yo yena yame maem. Ne wi mua papako aposel eliw akena wia naiman, nain yo feenap mainen, makena, yo mua meta marewa-ke, nain yos pun aposel-ke, ne wis-ke me efa nomakemik, i unowiya epaskun. 12 Moram yo iiriw ni niamiya ikem nain kekanep uuwam-miok maa miililina unowa imenami Mua Maneka kekanowa nia ofakowam, naapeya sira nain urufap kakaemi Mua Maneka unuma piram-ikeman. Yo naap uuwam nain muut nan aposel ikem nain ariman yame wuam. 13 Ne wi Yeesus teeria owow unowa-pa ikemik nain sira unowa wia asipam-miem. Ne ni sira onaiya-ko nia onam-i? Weetak. Nis pun sira kuisow nain nia onam. Ae makena, maa kuisow fain wia. Yo maa enowa ne maa muutitik nain-ko me nia nomarem-ikem, weetak. Aa, nain eliw marew-yon, aria ni naap efa naep-na pina nain me efar kema suuweka.

14 Yo iiriw niar ikiwowa erup arem, ne aakisa pun niar ikiwowa maem-ikaiyem. Yo nia kookalep nia urufowa naep niar ikiwiyem, me maamuma yieka naep ikiwiyem, naapeya ni yoowa me niinen. Sira feenap, muuka wiipa-ke maa enowa ne maa muutitik imenap onak wiawi-ko me wia kakaltimik, weetak. Onak wiawi-ke makena, maa imenap muuka wiipa wia kakaltowa-ke. 15 Yo ni niawi saarik arem, naapeya kemelap ni muuta nain eliw yena maa unowa maa muutitik fufurumemi nia asipam-ikainen. Ne yena mia me kema suuwiyem, ni muuta nain naap oospem-ikainen. Yo manek akena nia kookaliyem, ne nis-ke nain furewap lawiliw-ko efa kookalowen-i?

16 Makena yo maamuma-ko me nia maakem-ikem, nain ni mua papako-ke feenap efa maowen-yon, “Aa, o miikapura yia mikami yia peeskimiya,” naap efa maowen. 17 Ne makena, i naap-ko onamik-i? Wi mua eena wia sesekam nain wia maakemkun nia peeskimemi maa-ko niar aawemik-i? 18 Yo sisewaremi Taitus sesekamkun niar ikiwok. Ne mua oko pun o wameiya sesekam. Nain Taitus-ke nia peeskimep maa niar aawok-i? I yiam erup kema kuisow ne sira epaskun ikaimik, naapeya i-ko nia peeskimep maa-ko niar aawemik-i?

19 Emar unowik, ni feenap-ko yia maiman-i? “Wi eena opora yia maakimik nain yiena mokoka-pa opora kakenu naep onimik.” I naap-ko onimik-i? Weetak, me ni opora yia maiman nain naep maemik, weetak. Krais-ke maeya i o opora-pa wiar aawep Mua Maneka mokoka-pa opora makena maemik. Ne maa unowa onimik nain i nia kekanowu naep uuwowa sira-sira onimik. 20 Moram yo kema moke ikem, oko wiimar ni niar ikiwemi yo eena nia maakem naap me ikaiwkin nia urufinen. Feenap, ni oporiw irakemi niam fo-fookap ikowen, maa kema kuowa, niam iririmem-ikowa, opora niam fienowa, niam tuunowa, ne murarow opora niam onowa. Ni emina kekanemi naap oni-ikiwemi niena kookalowa ookami momor maneka ikowen. Oko ni naap ikaiwkin yo ikiwep nia kakankinen. Oko efa maowen, i kekelka yia wuinon, naap efa naem-ikowen-na wia. 21 Ni sira samora iiriw onaman nain kema me kirowen, enum erua sira-pa naap ikowen, ne uruw mia ululkowa-ke naap niar ikainon. Ni naap ikaiwkin yo nainiw ikiwep nia urufinen-na Mua Maneka-ke unuma iiwawun efa poreya yo emina ururep kema iiwawun samorarinen.